ឆក់​កាបូបជន​​បរទេស​ក្បែរ​វិមាន​សន្តិ​ភាព មិន​សម្រេច​ហើយ ជាប់​ខ្នោះ

ភ្នំពេញ៖ បុរស​៣​នាក់​ក្នុង​នោះ​មាន​ម្នាក់ ជា​មន្ត្រី​យោធា​ក្រសួង​ការពារ​ជាតិ​ផង​នោះ ត្រូវ​បាន​សមត្ថកិច្ច​ចាប់ខ្លួន ក្រោយ​ធ្វើ​សកម្ម​ភាព​ឆក់​កាបូបបរទេសមិនបានសម្រេច កាលពី​វេលា​ម៉ោង៨និង​១៥នាទី យប់ថ្ងៃទី១២ ខែ​មក​រា​ ឆ្នាំ២០១៨ នៅចំណុចវិមានសន្តិភាព ស្ថិតក្នុ​ង​សង្កាត់វាងវង់ ខណ្ឌ៧មករា ។

ជនសង្ស័យទាំង៣ រួមមាន ទី១-ឈ្មោះ សមុ​ទ្រ ពុទ្ធី ភេទប្រុស អាយុ២២ឆ្នាំ មុខរបរ មិន​ពិត​ប្រាកដ (នៅផ្ទះ) ទី២-ឈ្មោះ អោប ធីរូ ភេទប្រុស អាយុ២១ឆ្នាំ មុខរបរ ទាហាន​ក្រសួ​ង​ការពារជាតិ ឋានៈអនុសេនីយ៍ត្រី និង​ទី៣-ឈ្មោះ ប្រុស ឧត្តម ភេទប្រុស អាយុ​២២ឆ្នាំ មុខរបរជាងទូរស័ព្ទ ។

បើតាមសាក្សីជាអ្នក​រត់កង់បី ដែល​ដឹក​ជន​រង​គ្រោះ​បានប្រាប់ថា នៅវេលាកើតហេតុខាងលើ ខណៈខ្លួនដឹកជនរងគ្រោះដល់ចំណុចកើតហេតុ ក៏ពើបប្រទះជនសង្ស័យទាំង៣ ហើយ​ពួក​គេបានធ្វើសកម្មភាពឆក់កាបូបពីជនបរទេសរូបនោះ ប៉ុន្តែមិនបានសម្រេច។ ពួកគេ​បាន​ប្រើ​ប្រាស់​ម៉ូតូ​២គ្រឿង មានម៉ាក ហុងដាឌ្រីម ធុន​សេ​១២៥ ចំនួន១គ្រឿង និងម៉ាក និច ចំនួន១​គ្រឿ​ង សម្រាប់​ធ្វើ​សកម្មភាព ។​ ទោះ​​ជា​យ៉ាង​ណា ជនរង​គ្រោះ​ជា​ជន​ជាតិបរទេស មិន​ព្រម​ដាក់​ពាក្យ​បណ្តឹង​ឡើយ ​។ បច្ចុប្បន្ន ជន​សង្ស័យ​ត្រូវ​បាន​បញ្ជូនទៅ​ធ្វើ​ការ​សាក​សួរ​បន្ថែម និង​កសាង​សំណុំរឿង ដើម្បី​ចាត់​ការ​តាម​ច្បាប់ ៕