Live វីដេអូ បកស្រាយ​បន្ថែម​ទៀត រឿង​គ្រូ​បាលី​ដេក​ជាមួយ​ស្រី​ស្នេហ៍​ក្នុង​កុដិ

រាជធានី​ភ្នំពេញ៖ កាល​ពី​រសៀល​ថ្ងៃទី​២ ខែវិច្ឆិកា ឆ្នាំ​២០១៧ ព្រះសង្ឃ​ទីប្រឹក្សា ព្រះគុណម្ចាស់ ហោ សុខុន ព្រះ​គ្រូ​ចៅ​អធិការ​វត្ត​ច្បារ​អំពៅ បាន​ឡាយ​វីដេអូ​ក្នុង​គណនី​ហ្វេសប៊ុក​ផ្ទាល់​ព្រះ​អង្គ ដើម្បី​បកស្រាយ រឿង​គ្រូ​ភាសា​បាលី នៅ​វត្ត​ច្បារ​អំពៅ នាំ​ស្រី​ស្នេហ៍​ទៅ​ដេក​ជាមួយ​នៅ​ក្នុង​កុដិ។ នៅ​ក្នុង​វីដេអូ​ឡាយ​នោះ មាន​ទាំង​សាមី​ជន​ទាំង​ពីរ នៃ​ព័ត៌មាន​បែកធ្លាយ​នោះ គឺ គ្រូ​ភាសា​បាលី ព្រះគុណម្ចាស់ យិន វ៉ាយ និង នាង ហ៊ាន លាងហ័ង និង​បុរស​ម្នាក់​ដែល​ត្រូវ​ជា​បងប្រុស​បង្កើត​របស់​សាមី​ជន​ខាង​ស្រី​ផង។

ក្នុង​វីដេអូ Live ព្រះគុណម្ចាស់ ហោ សុខុន មាន​ដីកា​ថា នោះ​ជា​ព័ត៌មាន​មិន​ពិត​ដែល​ត្រូវ​បាន​កាត់ត​ដោយ​ផេក​មួយ ដែល​មាន​គោលបំណង​បង្ខូច​កេរ្តិ៍​ឈ្មោះ​វត្ត​ច្បារ​អំពៅ ជា​ពិសេស ព្រះគុណម្ចាស់​ម្ចាស់​ផ្ទាល់​ព្រះអង្គ ព្រោះ​គេ​គិត​ថា ធ្វើឲ្យ​ខូច​ឈ្មោះ​ព្រះសង្ឃ​ក្នុង​វត្ត នឹង​ធ្វើ​ឲ្យ​ខូច​ឈ្មោះ​វត្ត​បាន​ដូច​គ្នា។ ចំណែក​ព្រះគុណម្ចាស់ យិន វ៉ាយ និង​សាមី​ខ្លួន​ខាង​ស្រី គ្រាន់តែ​ជា​អ្នក​រងគ្រោះ រង​អយុត្តិធម៌​តែ​ប៉ុណ្ណោះ។

ព្រះគុណម្ចាស់​ថា មិន​ជួយ​ព្រះសង្ឃ​ដែល​ខិលខូច​ទេ តែ​លុះ​តា​តែ​ជា​ការ​ពិត ព្រះគុណម្ចាស់​ម្ចាស់​នឹង​ចាត់ការ​ទៅ​តាម​ច្បាប់ បើ​ទោះ​ជា​ព្រះសង្ឃ​ក្នុង​វត្ត ជា​សិស្ស​ព្រះ​គុណ​ម្ចាស់​ក៏​ដោយ តែ​បើ​លោក​មិន​ខុស ហើយ​ចង់​ធ្វើបាប​លោក សូម​ឲ្យ​រំលង​សព​ព្រះ​គុណ​ម្ចាស់​សិន។ ព្រះគុណម្ចាស់​បាន​សំណូម​ពរ​ឲ្យ​ប្រភព​ដើម​ដែល​យក​ព័ត៌មាន​យក​ភស្តុតាង​មក​ជួប​សួរ​ដេញដោល​គ្នា​ជា​សាធារណៈ ជាមួយ​សាមី​ខ្លួន​ទាំងពីរ​រូប និង ព្រះគុណម្ចាស់​ព្រះ​គ្រូ​ចៅ​អធិការ​វត្ត​ផង បើ​ម្ចាស់​ផេក ក្លាហាន។

ចំណែក សាមី​ខ្លួន​ទាំង​ពីរ​បាន​បដិសេធ ថា​នោះ​មិន​មែន​ជា​ការ​ពិត។ ព្រះ​គុណ​ម្ចាស់ យិន វ៉ាយ បាន​មាន​សង្ឃដីកា​សារភាព​ថា បាន​ស្គាល់​សាមីជន​ខាង​ស្រី នាង ហ៊ាន លាងហ័ង មែន តែ​ត្រឹមតែ​មិត្ត​រួម​ថ្នាក់​រៀន​ជាមួយ​គ្នា ប៉ុណ្ណោះ។ ចំណែក​នាង លាងហ័ង បាន​សារភាព​ថា ក្នុង​រូប​នោះ ជា​មុខ​របស់​នាង​មែន តែ​ដៃ ជើង សក់ និង​ផ្សេង​ទៀត មិន​មែន​ជា​រូប​របស់​នាង​ទេ គឺ​គេ​យក​តែ​មុខ​នាង ទៅ​កាត់ត​ដាក់​ដង​ខ្លួន​អ្នក​ផ្សេង។

ព្រះគុណម្ចាស់​បាន​សំណូម​ពរ​ឲ្យ​ម្ចាស់​ផេក​កែ​តម្រូវ​ព័ត៌មាន និង​សុំ​ទោស​ជា​សាធារណៈ ចំពោះ​ព័ត៌មាន​ដែល​បាន​ចុះ​ផ្សាយ​ដែល​ខុស​ឆ្គង​នោះ ព្រះគុណម្ចាស់​នឹង​លើកលែង​ទោស​ឲ្យ​មិន​ប្រកាន់​ទោស​អូស​ដំណើរ​ត​ទៀត​ទេ។ ព្រះគុណម្ចាស់​បាន​មាន​ដីកា​ព្រមាន​ធ្ងន់​ៗ​ថា បើ​ម្ចាស់​ផេក​មិន​កែតម្រូវ​ព័ត៌មាន​ខុស​ឆ្គង​នេះ​ទេ ព្រះគុណម្ចាស់​ម្ចាស់​នឹង​ចាត់​វិធានការ​ផ្លូវ​ច្បាប់​លើ​បុគ្គល​ម្ចាស់​ផេក​ឲ្យ​ខាន​តែ​បាន ហើយ​បើ​ចាំ​ព្រះអង្គ​ចាត់​វិធានការ​តាម​ច្បាប់​ហើយ​ទោះ​សុំទោស​ក៏​យឺត​ពេល​ដែរ បើ​សុំ​ទោស សូម​ធ្វើ​ឲ្យបាន​លឿន។ ព្រះគុណម្ចាស់​បាន​បញ្ជាក់​ថា ព្រះគុណម្ចាស់​ម្ចាស់​មិន​មែន​ពូជ​អ្នក​លេង​ទេ តែ​ជា​ពូជ​អ្នក​មែន និង​ជា​ព្រះសង្ឃ​ដែល​មាន​បញ្ញា​បារមី។

ដើម្បី​ឲ្យ​កាន់តែ​ពិស្ដារ សូម​ទស្សនា​វីដេអូ Live ដូច​ខាងក្រោម៖