ប្រកាស​សាលក្រម​ផ្ដន្ទា​ទោស​ក្រុម​ចោរប្លន់​ដាក់​គុក​ជាង​២០០​ឆ្នាំ

ភ្នំពេញ៖ នៅ​រសៀល​ថ្ងៃទី​២៥ ខែកក្កដា ឆ្នាំ​២០១៧​នេះ លោក ហេង កេសរោ ប្រធាន​ក្រុម​ប្រឹក្សា​ចៅក្រម​ជំនុំ​ជម្រះ​នៃ​សាលា​ដំបូង​រាជធានី​ភ្នំពេញ បាន​ប្រកាស​សាលក្រម​ផ្ដន្ទាទោស ដាក់​ពន្ធនាគារ ចន្លោះ​ពី​១០៨​ឆ្នាំ ទៅ​ដល់ ១៣៨​ឆ្នាំ ពាក់ព័ន្ធ​ករណី​ប្លន់​ម៉ូតូ និង​បាញ់​សម្លាប់​ជន​រងគ្រោះ​នៅ​ក្នុង​រាជធានី​ភ្នំពេញ ចំនួន ៦​លើក។

តុលាការ​បាន​សម្រេច​ផ្ដន្ទាទោស​ជន​ជាប់ចោទ​ទាំង ៦នាក់ ដូច​តទៅ៖

-ទី១​មាន​ឈ្មោះ សេត ម៉ាត់រូហ្សេត ហៅ សេត ឌៀង ភេទ​ប្រុស អាយុ ២២​ឆ្នាំ ជាប់​ពន្ធនាគារ សរុប​១៣៨​ឆ្នាំ

-ទី២​ឈ្មោះ ប៉ែន ចំណាប់ ហៅ ពីន ភេទ​ប្រុស អាយុ​១៨​ឆ្នាំ ទី៣​ឈ្មោះ អ៊ឹម សុភ័ក្រ ភេទ​ប្រុស អាយុ​២៣​ឆ្នាំ,ទី៤ឈ្មោះ អេង អារីពីន ភេទ​ប្រុស ដាក់​ពន្ធនាគារ សរុប​ក្នុង​ម្នាក់ៗ ១២០​ឆ្នាំ

-ទី៥​ឈ្មោះ ពេជ្រ សូណែត ភេទ​ស្រី អាយុ​២១​ឆ្នាំ និង​ទី៦​ឈ្មោះ ញ៉ែម កន្និដ្ឋា ហៅ អាម៉ី ភេទ​ស្រី អាយុ​២១​ឆ្នាំ ដាក់​ពន្ធនាគារ​សរុប​ក្នុង​ម្នាក់ៗ ១០៨​ឆ្នាំ។

ក្រោម​បទ​ចោទ​ប្រកាន់ លួច​មាន​ស្ថាន​ទម្ងន់​ទោស​ដោយសារ​ប្រព្រឹត្ត​អំពើ​ហិង្សា និង​ដោយសារ​មរណភាព​នៃ​ជន​រងគ្រោះ បទ​កាន់​កាប់​អាវុធ​ដោយ​គ្មាន​ការ​អនុញ្ញាត និង​បទ​មិន​រាងចាល ប្រព្រឹត្ត​នៅ​រាជធានី​ភ្នំពេញ អំឡុង​ឆ្នាំ​២០១៥ បទ​ល្មើស​ដែល​មាន​ចែង​ឲ្យ​ផ្តន្ទាទោស​តាម​បញ្ញត្តិ​មាត្រា ៨៣ មាត្រា ៨៤ មាត្រា ៣៥៣ មាត្រា ៣៥៧ មាត្រា ៣៦០ និង មាត្រា ៤៩០ នៃ​ក្រម​ព្រហ្មទណ្ឌ។

គួរ​រំលឹក​ថា លោក ហេង កេសរោ ប្រធាន​ក្រុម​ប្រឹក្សា​ចៅ​ក្រម​ជំនុំ​ជម្រះ​នៃ​សាលា​ដំបូង​រាជធានី​ភ្នំពេញ កាល​ពី​ព្រឹក​ថ្ងៃទី​១១ ខែមេសា ឆ្នាំ​២០១៧ កន្លង​ទៅ បាន​ផ្តន្ទាទោស ជន​ជាប់​ចោទ​ទាំង​៦​នាក់ លើ​ករណី​ប្លន់​ប្រដាប់​អាវុធ ចំនួន ៣​លើក​ដូច​ត​ទៅ៖

-ទី១​មាន​ឈ្មោះ សេត ម៉ាត់រូហ្សេត ហៅ សេត ឌៀង ភេទ​ប្រុស អាយុ​២២​ឆ្នាំ ជាប់​ពន្ធនាគារ សរុប​៧៣​ឆ្នាំ

-ទី២​ឈ្មោះ ប៉ែន ចំណាប់ ហៅ ពីន ភេទ​ប្រុស អាយុ​១៨​ឆ្នាំ, ទី៣​ឈ្មោះ អ៊ឹម សុភ័ក្រ ភេទ​ប្រុស អាយុ​២៣​ឆ្នាំ, ទី៤​ឈ្មោះ អេង អារីពីន ភេទ​ប្រុស ដាក់​ពន្ធនាគារ សរុប​ក្នុង​ម្នាក់ៗ​៦៥​ឆ្នាំ

-ទី៥​ឈ្មោះ ពេជ្រ សូណែត ភេទ​ស្រី អាយុ​២១​ឆ្នាំ និង​ទី៦​ឈ្មោះ ញ៉ែម កន្និដ្ឋា ហៅ អាម៉ី ភេទ​ស្រី អាយុ​២១​ឆ្នាំ ដាក់​ពន្ធនាគារ​សរុប​ក្នុង​ម្នាក់ៗ​៥៦​ឆ្នាំ។

នៅ​ក្នុង​សវនាការ​កាល​ពី​ពេល​កន្លង​ទៅ​ជន​ជាប់ចោទ​ទាំងអស់​សុទ្ធតែ​ឆ្លើយ​បដិសេធ​ថា ខ្លួន​មិន​បាន​ប្រព្រឹត្ត ដោយ​ឆ្លើយ​ដាក់​ទៅ​លើ​ឈ្មោះ ម៉ី និង​ឈ្មោះ លីម ដែល​ត្រូវ​កម្លាំង​កង​រាជ​អាវុធហត្ថ​បាញ់​ស្លាប់​នៅ​សង្កាត់​ពញាពន់ ខណ្ឌ​ព្រែកព្នៅ៕ ម៉ម វ៉ាន