ជិះ​ម៉ូតូ​បញ្ច្រាស​ផ្លូវ ត្រូវ​រថយន្ត​ព្រូស​បុក​ពី​មុខ​ពេញ​ទំហឹង​បណ្ដាល​ឲ្យ​ស្លាប់​មួយ​រំពេច

ភ្នំពេញ៖ បុរស​ម្នាក់​បាន​ស្លាប់​ភ្លាមៗ​នៅ​នឹង​កន្លែង​យ៉ាង​អាណោច​អាធ័ម ព្រោះ​តែ​ជិះ​ម៉ូតូ​បញ្ច្រាស​ផ្លូវ ត្រូវ​រថយន្ត​ព្រូស​បើក​យ៉ាង​លឿន​មក​បុក​ពី​មុខ​ពេញ​ទំហឹង កាល​ពី​វេលា​ម៉ោង​២​និង​១០​នាទី​រំលង​អាធ្រាត ឈាន​ចូល​ថ្ងៃ​ទី​១៨ ខែ​មិថុនា ឆ្នាំ​២០១៧ នៅ​ចំណុច​លើ​ស្ពាន​អាកាស​៧​មករា ស្ថិត​ក្នុង​សង្កាត់​បឹង​កក់១ ខណ្ឌ​ទួល​គោក រាជធានី​ភ្នំពេញ ។

បុរស​រងគ្រោះ​ដែល​ស្លាប់​បាត់​បង់​ជីវិត មិន​ទាន់​ស្គាល់​អត្ត​សញ្ញាណ​នោះ​ទេ ដោយ​រូប​គាត់​ជិះ​ម៉ូតូ​ម៉ាក សេ​១០០ ពណ៌​ក្រហម ពាក់​ស្លាក​លេខ ស្វាយ​រៀង 1C-9805 ។ ចំណែក​អ្នក​បើកបរ​រថយន្ត​បង្ក​ម៉ាក​ព្រូស ពណ៌​ខៀវ ពាក់​ស្លាក​លេខ​ភ្នំពេញ 2AB-8563 ក៏​មិន​ទាន់​បាន​ស្គាល់​អត្ត​សញ្ញាណ​នោះ​ដែរ ក្រោយ​ពេល​កើត​ហេតុ​ភ្លាមៗ​សមត្ថកិច្ច​មូល​ដ្ឋាន​បាន​ចុះ​ឃាត់​ខ្លួន​យក​ទៅ​ប៉ុស្ដិ៍​នគរបាល​បឹង​កក់​១ ហើយ​បញ្ចូន​បន្ត​ទៅ​កាន់​អធិការ​ដ្ឋាន​នគរបាល​ខណ្ឌ​ទួលគោក ។

បើ​យោង​តាម​ប្រភព​ព័ត៌មាន​ពី​កន្លែង​កើត​ហេតុ​បាន​ឲ្យ​ដឹង​ថា នៅ​មុន​ដំបូល​គេ​សង្កេត​ឃើញ បុរស​រង​គ្រោះ​ម្នាក់​ដែល​ស្លាប់​បាត់​បង់​ជីវិត បាន​ជិះ​ម៉ូតូ​ម្នាក់​ឯង ធ្វើ​ដំណើរ​តាម​បណ្ដោយ​ផ្លូវ​កម្ពុជា​ក្រោម ទិស​ដៅ​ពី​កើត​ទៅ​លិច ហើយ​បាន​ជិះ​ឡើង​លើ​ស្ពាន​អាកាស​៧​មករា ទាំង​មិន​ដឹង​ថា​ខ្លួន​ឯង​ជិះ​ម៉ូតូ​បញ្ច្រាស​ផ្លូវ ខណៈ​ពេល​នោះ​ក៏​មាន​រថយន្ត​ម៉ាក​ព្រូស​១​គ្រឿង បាន​បើក​មក​ពី​ផ្លូវ​សហព័ន្ឋ​រុស្សុី ទិស​ដៅ​ពី​លិច​ទៅ​កើត​ក្នុង​ល្បឿន​លឿន ហើយ​ស្រប​ទិស​ដៅ​ចរាចរណ៍​ផង​ដែរ ក៏​បាន​មក​បុក​ម៉ូតូ​បុរស​រងគ្រោះ​ខាង​លើ​ចំ​ពី​មុខ​យ៉ាង​ពេញ​ទំហឹង បណ្ដាល​ឲ្យ​បុរស​រង​គ្រោះ​ម្ចាស់​ម៉ូតូ​ដួល​ផ្លោង​អូស​តាម​រថយន្ត​បង្ក​ជាង​៤០​ម៉ែត្រ បណ្ដាល​ឲ្យ​ស្លាប់​ភ្លាមៗ​នៅ​និង​កន្លែង​តែ​ម្ដង ចំណែក​ឯ​រថយន្ត​និង​ម៉ូតូ​បាន​រង​ការ​ខូច​ខាត​ពី​មុខ​ដូច​គ្នា​យ៉ាង​ដំណំ ។

ក្រោយ​ពេល​កើត​ហេតុ​ភ្លាម​ៗ សមត្ថកិច្ច​មូល​ដ្ឋាន​បាន​ចុះ​ទៅ​ឃាត់​ខ្លួន​អ្នក​បើកបរ​រថយន្ត​បង្ក​នៅ​កន្លែង​កើត​ហេតុ​ភ្លាមៗ ហើយ​ធ្វើ​ការ​វាស់​វែង​យក​ម៉ូតូ​ជន​រងគ្រោះ​និង​រថយន្ត​បង្ក​រួម​ទាំង​ម្ចាស់​យក​ទៅ​កាន់​ការិយាល័យ​ចរាចរណ៍​ជើង​គោក​រាជធានី​ភ្នំពេញ រង​ចាំ​ដោះ​ស្រាយ​គ្នា​តាម​ផ្លូវ​ច្បាប់ ។ ដោយ​ឡែក​សព​ជន​រងគ្រោះ​ត្រូវ​បាន​ក្រុម​គ្រូពេទ្យ​ខាង​កោសល្យវិច័យ​ចាត់​ចែក​ដឹក​យក​ទៅ​វត្ត​សំរោង​អណ្ដែត រងចាំស្វែងរកសាច់ញាតិក្រុមគ្រួសារ ប្រគល់​សព​យក​ទៅ​ធ្វើ​បុណ្យ​តាម​ប្រពៃណី៕